Que é a Rede eusumo
Que é a Rede Eusumo: É unha rede impulsada pola Consellería de Traballo e Benestar para o fomento do cooperativismo e a economía social. Con ela procúrase o fomento do espírito emprendedor no ámbito local, comarcal e transfronteirizo prestando apoio directo á creación e consolidación de emprego con base na economía social, no territorio de actuación.
A Rede Eusumo créase para promover este modelo empresarial en todo o territorio de Galicia, impulsando o seu desenvolvemento no ámbito local, a través de accións de formación, divulgación e asesoramento para o autoemprego colectivo.
Os obxectivos da Rede son a promoción e fomento do cooperativismo e a economía social, do emprendemento, e da creación e consolidación de emprego, no ámbito local, comarcal e transfronteirizo; e concrétanse ao redor dos seguintes eixos:
1. Información, formación, orientación e asesoramento en temáticas vinculadas ao cooperativismo e a economía social, fomento do autoemprego e o emprendemento a través do acompañamento e asesoramento de proxectos cooperativos.
2. Posta a disposición de medios para o emprendemento entre os que se inclúen as instalacións para albergar o comezo de iniciativas empresariais.
3. Reforzo da presenza de asociacións e empresas de economía social en redes de intercooperación de carácter nacional e internacional para a promoción do cooperativismo e a economía social
4. Promoción e fomento das Tecnoloxías da Información e Comunicación así como o impulso da I+D+i e do traballo en rede.
5. Apoio á comercialización e internacionalización, promovendo encontros internacionais e transfronteirizos para o intercambio comercial e a cooperación empresarial.
6. Realización de análises e estudos en temáticas de interese para a economía social, así como para o desenvolvemento local.
Enmárcanse tamén como obxectivos da mesma, o acompañamento de proxectos de economía social así como rendibilizar e achegar aos cidadáns diferentes recursos e infraestruturas de institucións, entidades ou organizacións con interese en adherirse á Rede
Actividades: As actividades que se pretenden impulsar coa creación da Rede Eusumo encádranse dentro do Programa Operativo do Fondo Social Europeo 2007-2013
A Rede realizará todo tipo de actividades encamiñadas ao cumprimento dos obxectivos indicados no epígrafe anterior. Entre elas, destácanse as seguintes:
a) Información e asesoramento nos centros.
b) Accións formativas dirixidas aos posibles emprendedores.
c) Prospección dos xacementos de emprendemento e selección de destinatarios das accións de asesoramento, información e formación.
d) Acompañamento de proxectos, titorización e asesoramento para a conformación da empresa e durante os primeiros anos de actividade.
e) Apoio ao emprendemento mediante a posta a disposición de viveiros para empresas de economía social.
f) Fomento da coordinación de accións e promoción de proxectos de carácter internacional.
g) Promoción e dinamización do traballo en rede para a colaboración en temas comúns, tales como a comercialización e a apertura conxunta de mercados.
h) Realización de accións formativas en materia de novas tecnoloxías.
i) Establecemento de centros de documentación para a súa consulta por parte de entidades de economía social, persoas emprendedoras e público en xeral.
j) Promoción da asistencia conxunta a feiras nacionais e internacionais e da mellora das estratexias de comercialización.
k) Establecemento dunha liña permanente de investigación sobre posibilidades de desenvolvemento local para o territorio.
l) Desenvolvemento de estudos sectoriais promovendo a cooperación con entidades do territorio.
m) Campañas publicitarias de divulgación e difusión das potencialidades, valores e realidades da economía social.
